Bəyanatda deyilir ki, iki gün əvvəl osetin separatçıları Gürcüstanın nəzarətində olan yeni əraziləri ələ keçirmək niyyətləri haqda bildiriblər. Çox keçmədən onların niyyətlərini Rusiya hərbçiləri həyata keçirmək istəyib. Söhbət Gürcüstanın nəzarətində olan Kazbek rayonunun Truso dərəsindən gedir və osetin tərəfi həmin ərazilərin “qədim osetin torpağı” olduğunu iddia edərək sərhədləri qabağa çəkməyə çalışır.
Rəsmi Tiflis Qori rayonuna Rusiya hərbçilərinin müdaxiləsini qətiyyətlə pisləyərək mümkün təxribatlara görə bütün məsuliyyətin Moskvanın üzərinə düşəcəyini bildirir. Gürcüstan XİN eyni zamanda beynəlxalq ictimaiyyəti bu təcavüz faktına diqqət yetirməyə çağırır.
Xatırladaq ki, son günlər gürcü-osetin münaqişəsi zonasında vəziyyətin yenidən gərginləşməsi müşahidə edilir. İyulun 29-dan başlayaraq Cənubi Osetiya separatçıları Gürcüstan ordusunun mövqelərindən Sxinvali şəhərinin ağır silahlarla atəşə tutulduğu haqda məlumatlar yayıblar. Ötən həftə sonu Rusiya Müdafiə Nazirliyi bu atəşlərə “bütün vasitələrlə cavab verilə biləcəyi” haqda xəbərdarlıqla çıxış edərək Gürcüstana ötən ilin avqustunda baş verənləri xatırladıb.
Rəsmi Tiflis və münaqişə bölgəsindəki beynəlxalq müşahidəçilər Sxinvalinin atəşə tutulması faktını təkzib edirlər. Buna baxmayaraq Rusiya və Cənubi Osetiya mənbələri davamlı olaraq Gürcüstanın “sərhəddə” hərbi qüvvə cəmləşdirdiyi və guya Sxinvali üzərinə yeni hücuma hazırlaşdığı haqda həyəcanlı xəbərlər yaymaqdadır. Ekspertlər vəziyyətin ötən il avqustun 8-də Rusiyanın Cənubi Osetiya əhalisinin müdafiəsi adı altında Gürcüstana hərbi müdaxiləsi ərəfəsini xatırlatdığını bildirirlər.
Məlumatlara görə, on minlərlə hərbçidən ibarət Rusiya qoşun qruplaşmaları Şimali Qafqazdakı hərbi bazalarda Gürcüstana mümkün müdaxilə üçün hazır vəziyyətdə gözləyir.