“News.am” saytına açıqlamasında o bildirib ki, Dağlıq Qarabağın yekun statusunu müəyyən etmək üçün nəzərdə tutulan “referendum”, “plebistsit” və “leqal öz iradəsini ifadə etmə” terminləri arasında heç bir fərq yoxdur. “Bütün bunlara beynəlxalq diplomatiyada evfemizmlər deyilir (evfemizim-qarşı tərəfin narazılığına səbəb ola biləcək hansısa arzuolunmayan ifadənin və ya terminin mənası onunla eyni olan başqa ifadə ilə əvəzlənməsi, habelə müəyyən faktları pərdələmək üçün işlədilən ifadələrdir).

Bununla da Brayza “referendum” termininin Azərbaycan ictimaiyyətində narazılıq yarada biləcəyini nəzərə alaraq onu daha qeyri-müəyyən və anlaşılmaz “leqal öz iradəsini ifadə etmə” anlayışı ilə əvəz edildiyini açıqlamış olub. Şübhə yoxdur ki, bu ifadə sənədə Azərbaycan ictimaiyyətini aldatmaq üçün daxil edilib. Yəni münaqişənin nizamlanmasının baza prinsiplərində “referendum” ifadəsinin yer alması o deməkdir ki, bu anlaşma gələcəkdə Dağlıq Qarabağın Azərbaycandan de-yure qoparılmasına xidmət edəcək. Erməni müxbiri Brayzaya “Siz bu öz iradəsini ifadə etmə əsasında Dağlıq Qarabağın müstəqil subyekt olmasını mümkün hesab edirsinizmi” sualını verib. Amerikalı diplomat isə buna belə cavab verib: “Mənim tərəfimdən danışıqları prosesinin yekununu şərh etmək düzgün olmazdı. Hansı ki, bu danışıqlar prosesi zamanı Qarabağın yekun statusunu müəyyən edəcək səsvermənin model i müəyyən olunmalıdır. Səsvermənin nəticəsini bəri başdan şərh etmək isə çətindir. Əsas ideya odur ki, bəzi baza prinsiplərini ümumiləşdirməyə yaxınıq, bu prinsiplər Helsinki yekun aktının əsas müddəalarını özündə əks etdirir və öz müqəddəratını təyin etmə, ərazi bütövlüyü və güc tətbiqindən imtinaya əsaslanır”.

Xatırladaq ki, ötən həftə Minsk Qrupu həmsədrləri Polşanın Krakov şəhərində görüşərək “Madrid prinsipləri”ni həmsədr dövlətlərin prezidentlərinin təlimatına uyğun olaraq yeniləyiblər. Bu yeniliklərin nədən ibarət olduğu bilinmir, ancaq görünən odur ki, referendum prinsipi dəyişməz qalır.