Bu gün Avropaliqanın üçüncü təsnifat mərhələsinin ilk oyunlarına start verildi. Azərbaycanın turnirdəki yeganə təmsilçisi olan Ağdamın "Qarabağ" klubu Finlandiyada yerli "Honka" klubunun qonağı oldu.

Oyunun elə 2-ci dəqiqəsində “Qarabağ” rəqib komandanın qapısına təhlükəli zərbə endirdi. Matçın 17 –ci dəqiqəsində isə Fərhad komandamızı qoldan xilas etdi. Hakanpanın cərimə zərbəsi çox təhlükəli alındı. 37-ci dəqiqədə "Qarabağ" təhlükəli vəziyyət yaratmaqla yadda qaldı. Belə ki, Maksimin qüvvətli zərbəsindən sonra top qapının üstündən keçdi. Birinci hissənin sonlarında isa Rəşad Sadıqov son anda Sevecin qarşısını alaraq 0:0 hesabını qorumağı bacardı.

İkinci hissənin 49 –cu dəqiqəsində Fərhad kobud səhvə yol verdi. Lakin xoşbəxtlikdən təhlükə sovuşdu. Oyunun 60 –cı dəqiqəsində Vüqar gözəl imkandan yararlana bilmədi.

66 –cı dəqiqədə isə "Qarabağ" yüzfaizlik imkanı əldən verdi. Belə ki, Elvinin ötürməsindən sonra Vüqar boş qapını nişan ala bilmədi. Yüzfaizlik qol ötürmələrinin nəticəsiz qaldığını görən Elvin Məmmədov 70-ci dəqiqədə özü rəqibi cəzalandıraraq komandasını önə çıxardı. Oyun demək olar ki, həmyerlilərimizin üstünlüyü ilə keçdi. 83 –cu dəqiqədə "Qarabağ" ikinci qol imkanını qaçırdı. Elə oyunda son təhlükəli məqam da bu oldu və oyun komandamızın minimal qələbəsi ilə başa çatdı.

Qeyd edək ki, matçın 86 –cı dəqiqəsində Emin İmaməliyev meydanı tərk edərkən finlandiyalı azarkeşlər onu alqışlarla yola saldılar.